Раводиди навъи "О1" - ба шаҳрвандони хориҷӣ ва шахсони бешаҳрванд, ки ба Ҷумҳурии Тоҷикистон бо мақсадҳои зерин сафар мекунанд, дода мешавад:
- барои гирифтани маълумот оид ба таҳсил, дохил шудан ба муассисаҳои таҳсилотие, ки барномаҳои таълимии низоми таҳсилоти миёна, миёнаи техникӣ ва касбӣ, таҳсилоти олӣ, инчунин барномаҳои мубодилаи донишҷӯён ва курсҳои тайёриро амалӣ менамоянд;
- барои таҳсил дар муассисаҳои таҳсилотӣ ба ҳайси аспирантҳо, докторантҳо ва аъзои оилаи шахсони номбурда.
Раводиди навъи "О1"-ро муассисаҳои хориҷии Ҷумҳурии Тоҷикистон дар асоси дархости муассисаҳои таҳсилотии Ҷумҳурии Тоҷикистон ба муҳлати дархостшуда, вале на зиёда аз 3 моҳ ба расмият медароранд. Дорандаи раводиди навъи "О1" ҳуқуқи машғул шудан ба дигар фаъолият, ба ҷуз фаъолияти таълимӣ ва илмӣ надорад. Ҳангоми хориҷ намудани шаҳрванди хориҷӣ ва шахси бешаҳрванди бо раводиди навъи "О1" даъватшуда аз муассисаи таҳсилотӣ ё аз ҷониби шаҳрванди хориҷӣ ва шахси бешаҳрванд худсарона тарк намудани муассисаи таҳсилотии мазкур раводиди шаҳрванди хориҷӣ ва шахси бешаҳрванд бекор карда шуда, ба ў раводиди навъи хуруҷӣ барои баромадан аз ҳудуди Ҷумҳурии Тоҷикистон дода мешавад. Раводиди бисёркаратаи навъи "О1" метавонад ба муҳлати дархостшуда ё муҳлати амали шартномаи таҳсилотӣ, ки тибқи қонунгузории Ҷумҳурии Тоҷикистон ба расмият дароварда шудааст, вале на зиёда аз 1 сол тамдид гардад. Тамдиди раводиди навъи "О1" аз тарафи Сарраёсати консулӣ дар асоси дархости мақомоти ваколатдори Ҷумҳурии Тоҷикистон дар соҳаи маориф ва илм ё муассисаҳои таҳсилотии Ҷумҳурии Тоҷикистон ҳангоми пешниҳоди ҳуҷҷатҳои зерин сурат мегирад:
- нусха аз фармони муассисаи таҳсилотӣ ё илмӣ дар бораи қабул шудани шаҳрванди хориҷӣ ва шахси бешаҳрванд барои таҳсил дар муассисаҳои таҳсилотӣ, аспирантура ё докторантура;
- нусхаи билети донишҷў ва китобчаи имтиҳонӣ барои донишҷўёни муассисаҳои таҳсилоти олӣ;
- шартнома дар бораи таҳсилот.
Раводиди навъи "О2"- ба шаҳрвандони хориҷӣ ва шахсони бешаҳрванд, ки барои таълим, гузаронидани тадқиқоти илмӣ ва иштирок дар курсҳои забономӯзӣ ё курсҳои такмили ихтисос ташриф оварданианд, дода мешавад.
Раводиди навъи "О2" аз ҷониби муассисаҳои хориҷии Ҷумҳурии Тоҷикистон, намояндагиҳои Вазорати корҳои хориҷии Ҷумҳурии Тоҷикистон дар ҳудуди Ҷумҳурии Тоҷикистон дар асоси дархост ва муҳлати дар он нишондода, вале на зиёда аз 3 моҳ дода мешавад. Тамдиди чунин раводид аз ҷониби Сарраёсати консулии Вазорати корҳои хориҷии Ҷумҳурии Тоҷикистон дар асоси дархости муассисаҳои таҳсилотии Ҷумҳурии Тоҷикистон сурат мегирад. Дар ҳолати ба ҷуз таҳсилот бо фаъолияти дигар машғул шудани шаҳрванди хориҷӣ ва шахси бешаҳрванд, муҳлати будубоши шаҳрванди хориҷӣ ва шахси бешаҳрванд бо раводиди таҳсилотӣ метавонад аз ҷониби Вазорати корҳои хориҷии Ҷумҳурии Тоҷикистон бо дархости мақомоти ваколатдори Ҷумҳурии Тоҷикистон дар соҳаи маориф ва илм ё муассисаҳои таҳсилотии Ҷумҳурии Тоҷикистон маҳдуд карда шавад. Дар ин ҳолат, раводиди шаҳрванди хориҷӣ ва шахси бешаҳрванд бекор карда шуда, ба ӯ раводиди навъи хуруҷӣ барои баромадан аз ҳудуди Ҷумҳурии Тоҷикистон дода мешавад.
Санадҳои меъёрии ҳуқуқӣ:
Русский
Тоҷикӣ
English